الجمعة، 19 أبريل 2013

يوم فى الرعاية...


كان يا ما كان و يا سعد يا كرام و ما يحلى الكلام إلا بالصلاة على خير الأنام ..
ايه ده.. هو أنا هحكيلكم حدوتة قبل النوم و لا إيه..لأ لأ اصحوا كدة معايا. ده احنا لسة بنبتدى اليوم و النوبتجية لسة فى أولها.
أيوة.. أدينى بأفتح باب قاعة المرضى أهوه..أدخل بقى برجلى اليمين.. و لا مش هتفرق كدة كدة أنا عارفة إن رجلى خضرا.. يمين بقى و لا شمال مش فارقة.
يا خبر المريض ده نايم كدة ليه ( نايم فى وضع السجود)
يا حاج.. يا حاج.. هى النومة دى مريحاك كدة
"س": يعنى هتفرق فى ايه مريحانى و لا لأ. ما أنا برضه مش هعرف أنام
-          ليه بس. طيب أهديلك النور شوية.
"س": نور.. هى جت على النور.
الممرضة: يا دكتورة.. ممكن لو سمحتى؟؟
-          هو أنا لسة استلمت..ده أنا لسة مقلتش صباح الخير.
الممرضة: معلش بس المريض ده أنا تعبت معاه و مش قادرة أستحمل تانى. أنا بنت ناس برضه.
-          اهدى بس..فيه ايه؟؟!!
الممرضة: نازل أكل فى البرتقال و هو عنده التهاب فى المعدة و ممنوع ياكله و كل ما ياكله ..يرجع و نفسه يتكرش. و يصرخ و يقول الحقونى عندى هبوط و لما أشيل من جنبه البرتقال يشتمنى شتايم فظيعة.
-          برتقال!! و ازاى يدخل الرعاية أصلا و هو ممنوع؟؟!!
الممرضة: مع المريض "ص" مفيش ممنوع.
بصيت عليه لقيته قاعد مربع رجله فوق السرير و واخد كيس البرتقال فى حضنه و جنبه اتنين ستات.
-          مين دول؟؟
الممرضة: زيارة.
-          و ازاى مدخلين زيارة دلوقتى.
الممرضة: زى ما دخل البرتقال بالظبط.
-          يعنى ايه!!
الممرضة: دلوقتى تعرفى.
قربتله و صبحت عليه.. رد عليا بصوت يقشعر له البدن و هو بيمضغ البرتقال.
-          فطرت و لا لسة؟؟
"ص": فطرت و رجعت كل اللى أكلته و هفتان.
-          معلش ده عشان عندك التهاب فى معدتك و بنديلك علاج ليه و ربنا يكرمك بالشفا ان شاء الله. بس البرتقال ده هيتعبك زيادة. بلاش منه دلوقتى عشان ندى فر
-          "ص": تييييييييييييييييييييييييييييييييييييييييييييييييييييييييييييييييييت
عفوا للقراء بس الرقابة لا تسمح بنقل الكلام اللى قاله. ده غير ان صورتى هتتهز..قصدى هتقع
اممممممممم بصوا..هو من الآخر كدة. أنا اتبهدلت
و كملت البهدلة و الشتايم من الاتنين ستات اللى كانوا قاعدين اللى طلعوا زوجاته لما قلت ان ممنوع الدخول فى غير مواعيد الزيارة. و طبعا هم مش بيتكلموا بلسانهم بس.
و محدش يسأل هو الأمن فين.
و فشلت كل محاولات تهدئته
و محدش فيكم يفكر تهدئة مين..و يقول هو مش بيهزئك برضه و انت واقفة تهديه و الكلام ده. أيوة مهو أصله "مريض" و لازم " نستحمله".
و بعدين هو أساسا دلوقتى مش محتاج لحد يهديه لانه أساسا مش قادر ياخد نفسه. و وقفنا أنا و زميلى اللى كان سهران من النوبتجية اللى قبلها نعالجه لحد ما اتحسن و قام اتعدل يكمل على كيس البرتقال. سيبناه عشان استلم النوبتجية.
-          بسم الله توكلت على الله.
بعد ما استلمت دخلت حالة جديدة. مريض بجلطة فى القلب "ع" و للأسف دخل جنب المريض "ص". حظه كدة بقى. السرير اللى كان فاضى.
"ص": عايز ريموت التليفزيون.
الممرضة: حاضر.. بس المريض اللى جنبك تعبان. خمس دقايق و اجيبهولك.
"ص": تيييييييييييييييييييييييييييييييييييييييييييييييييييييت
الممرضة: لأ.. كدة كتير بقى
المريض "ع" بقى يا عينى مش بيتكلم بس عينيه بتقول كلام كتير من اللى سمعه رغم الألم اللى حاسس بيه لكن الكلام واضح انه تخطى الألم. و وجعله ودانه كمان.
و استمر وابل الشتايم بصوت جهورى لحد ما جابوله الريموت لدرجة انه خلانى لعنت فكرة ان يكون قدام كل مريض تليفزيون و اللى المفروض انه موجود عشان المريض ميزهقش انما معاه بقى وسيلة يزهق بيها كل اللى موجودين.
-          حد يوطى التليفزيون ده يا جماعة دى مبقتش رعاية مركزة.
"ص": تيييييييييت تيييييييييييييييييييييييت تييييييييييييييييييييييييييييييييييييييييييييييييت
اضطريت آسفة إنى أروح لحد عنده عشان اوطيه انا..مهو مش كل مرة الممرضة تتشتم كدة.
و خصوصا إن القناة اللى كان بيتفرج عليها ممنوعة على مرضى القلب.
أيووووة..بالظبط كدة.. تخيلوا.. بيتفرج على قناة اخباريةو بث مباشر من شارع قصر العينى و رئاسة الوزراء!!!!
-          اللى بتشوفه ده لوحده يجيبلك جلطة. اذا كنا احنا بنشوفه بالعافية و ربنا يستر.
"ص": ما أنا لازم أشوفه عشان ولادى هناك.
-          ولادك هناك!!.. فعلا !!
"ص":  أيوة طبعا.
-          معتصمين هناك!!!
"ص": لا يا ست معتصمين ايه..دول هناك عشان يربوا و لاد ال تييييييييييييييييييييييييييت
-          ايه!!! ( و تحسوا انى طلعلى بلوفر و انا بقولها )
"ص": أيوة.. مهم هناك مع البشوات حبايبى. أصل ولاد ال............. دول لازم يتربوا و يت.......................
وقفت قدامه و أنا ........
مش عارفة فة حالة ذهول و لا غضب و لا...
حاجات كتير قوى حسيت بيها.. ومش عارفة أعمل ايه؟؟
المريض اللى المفروض أعالجه طلع سمسار بلطجية من اللى بيطلعوا اخواتى من الميدان جثث.
يااااااا الله....
بلعت ريقى بمرارة و سيبته و دخلت أكمل شغل مع المريض "ع" و هو استمر فى ازعاجه بالشتايم اللى بيوجهها حتى اللى فى التليفزيون و دى مش أحوال يقعد فيها مرضى حالات حرجة محتاجين للهدوء. لدرجة انى فكرت أخرجه سوء سلوك لانه مسبب ازعاج للمرضى و مخليهم مش عارفين يرتاحوا.. و طبعا احنا كدة فاهمين كلام المريض "س".
عرضت الفكرة على الأخصائية و كان ردها: حرام عليكى أخرجه إزاى.
المرضى هيموتوا من الضغط العصبى اللى هم فيه و ده قانونى و القانون ده اتعمل للمريض اللى يتصرف زيه كدة.
الأخصائية: مهم كدة كدة بيموتوا.. ايه الجديد.. هنعمل ايه بس.
و طبعا فضلنا نتجادل فى حل للمشكلة و النتيجة 1-صفر لصالح تعذيب المرضى و انتهاك حقوقهم.
و فضلت طول ساعات النوبتجية اللى الحمد لله كانت قصيرة لمدة 12 ساعة بس قضيتها فى حلزونات ما بين حد بيتشتم و حد بيتبهدل.
و كعادتى انى بحب أتابع المرضى فى النوبتجيات اللى بعدى بالتليفون عرفت اللى حصل بعدها. و طبعا كان فيه مشاهد متكررة إلا من المشهد ده.......
بعد ما دامت معاناته أيام. قرر المريض "س" إنه يقوم من سريره و يروح لحد سرير المريض "ص" و يبدى استياؤه من تصرفاته و يطالب بحقه و حق المرضى الآخرين فى الراحة.
أيوووووووة..قام و على صوته و هتف و قال: يسقط يسقط حكم المماليك.
القراء: ايه يا بنتى..انتى فى الرعاية مش فى الميدان.
-          رعاية ايه و ميدان ايه!!! هو انتوا معندكوش خلفية..اشتروا ب 3 مليم جرنال متزوقينى يا ماما و انتوا تعرفوا ان الرعاية و الميدان..ايد واحدة.
القراء: ايه !!!!
هههههههههه واضح ان "ايه" بقت ثقافة شعب مش بس ثقافة بلوفرية.
-          - ما تصحوا بقى كدة و تركزوا شوية
الرعاية و الميدان ايد واحدة
المريض "ص" و المماليك ايد واحدة
الرعاية و ال.......
القراء: خلاص يا ستى فهمنا.. و ياريتنا ما فهمنا
و طبعا مش محتاجة أقول المشهد كمل إزاى.
القراء: طيب هو المريض "س" اتكلم لوحده.. يعنى باقى المرضى.. المريض "ع" اللى فى السرير اللى جنبه فضل ساكت و صابر يعنى ؟؟؟
-          لأ طبعا.. ساكت ايه و صابر مين!!! ده خرج حسب الطلب عشان يروح مستشفى تانية.
القراء: ايه!!!!!!
-          راح يدور على "وطن".. قصدى "رعاية" يقدر يقعد فيها.
القراء: اممممممممم و بعدين.. المريض "س" عرف يجيب حقه لوحده كدة.
-          هو فى الواقع يعنى.. بعد ما أخد نصيبه من التهزيق و البهدلة. ساد الصمت أجواء الرعاية بعد ما كل مريض من المرضى التانيين .....
القراء (مقاطعين): مرى تانيين ايه.. مهو المريض"ع" خرج.
-          أيوة..أنا قصدى التانيين.
القراء: تانيين ايه؟؟!! مكانش فيه حد تانى.
-          لأ كان فيه مرضى تانيين بس مكانش ليهم أى مواقف يعنى.
القراء: آااااه مستسلمين زى المريض "ع" يعنى.
-          لأ خالص المريض "ع" مكانش بيتكلم. لكن بيبدى الاستياء الصامت. و هرب بجلده برة و خلاص. لكن المرضى التانيين بقى نايمين على سرايرهم بياخدوا علاجهم و الدنيا تضرب تقلب حواليهم و هم عااااادى يعنى. حتى لو متضايقين برضه عاادى.
القراء: ليه.. هم خرس؟؟!!
-          لأ خرس ايه.. مهم بيتكلموا.
القراء: الحمد لله.. قالوا ايه ؟؟
-          كل واحد فيهم كان ليه رأى فى اللى حصل للمريض "س" من المريض "ص".
اللى قال.. هو ايه اللى وداه هناك
و اللى قال انه واخد فيتامينات و وجبة من كبداكى
و اللى قال كان معاه روشتة خارجية
لكن كلهم كانوا مجمعين على حاجة واحدة
القراء: ايه هى ؟؟
-          يخرب بيتك خربت الرعاية
فجأة كان فيه خبط و رزع على الباب و أصوات صراخخ و عويل
ايه ده!!!..فيه ايه!!!! مفيش حد مات فى الرعاية يعنى
و طلعوا بقى ايه.. أهل الريض "س" و بيشتموا و مبهدلين الدنيا عشان المريض "س" مات
و ظهرت نفس الأخصائية اللى كانت فى أول القصة و هى مستاءة من الشتايم اللى بتسمعها و الضوضاء و الازعاج اللى مسببينه.
القراء: يا سلااااااام.. و اشمعنى دلوقتى يعنى.
-          لأ معلش.. أنا مش بتكلم فى السياسة.
القراء: تييييييييييييييييييييييييت كبيرة قوى بقى.
-          احم.. عادى ما أنا اتعودت على كدة.
القراء: خلاص يعنى كلمتنا اللى وجعتك قوى.
-          خلينا فى الموضوع.. الأخصائية معجبهاش اللى بتسمعه و قررت و قررت تعمل خروج سوء سلوك للمريض "س".
القراء: ايـــــــه !!!!
-          يادى النيلة.. هو انتوا مصرين على البلوفرات ليه
القراء: احنا بس مش فاهمين حاجة. هم كانوا عاملين المظاهرة دى و بيشتموا ليه؟! مش عشان المريض "س" مات. يبقى ازاى بقى الأخصائية هتعمله خروج سوء سلوك. و بعدين مش هى دى نفس الأخصائية اللى كانت شايفة ان حرام تخرجى مريض لسوء السلوك.
-          طيب و هو مش أنا قلت انى مش بتكلم فى السياسة.
القراء: عاااااااااااااااااااااااااااااااااااااااااااا
-          اهدوا بس و أنا أفهمكم. أصل فيه أيادى خفية لولبيية عالية واصلة قوى و قدرت تجيب تليفون أهله و اتصلت بيهم و قالتلهم إنه مات و ده مش حقيقى طبعا و عليه هم اتصرفوا كدة.
-          ايه رأيكم بقى؟؟
-          ألووووووووووو.. انتوا رحتوا فين..

هناك تعليق واحد: